രണ്ട് അമ്മക്കഥകൾ - സുധാമൂർത്തി

 അറിഞ്ഞതിനും അനുഭവിച്ചതിനുമപ്പുറം അമ്മയെതേടുന്ന മക്കളുടെ കഥയാണ് " രണ്ട്  അമ്മക്കഥകൾ ". മനസ്സിൽ ആദ്രഭാവങ്ങളെ ആഴത്തിൽ സ്പർശിക്കുന്ന രണ്ടുനോവെല്ലകൾ. അമ്മയെന്നവാക്ക് ഒരു നദിപോലെ ഒഴുകിപ്പരന്ന് വായനക്കാരിൽ പറഞ്ഞറിയിക്കാൻ കഴിയാത്തതരത്തിൽ അനുഭൂതി സൃഷ്ടിക്കുന്ന തരം അതിമനോഹരമായ രചന. 
      ആദ്യ നോവൽ " വെങ്കിടേഷ് ".ബാങ്ക് ജീവനക്കാരനായ വെങ്കിടേഷ് ജോലി സംബദ്ധമായി ഹുബ്ലിയിലേക്ക് സ്ഥലമാറ്റംകിട്ടുന്നു. അയാളുടെ ഭാര്യ ശാന്ത - രണ്ടുമക്കളും അടങ്ങുന്നതാണ് അയാളുടെ കുടുംബം. മകൻ രവി അമ്മയുടെ പക്ഷവും,മകൾ ഗൗരി വെങ്കിടേഷി ൻ്റെ പക്ഷവും ആണ്. പണം സമ്പാദിക്കുക എന്നതുമാത്രമാണ് ശാന്തയുടെ ആത്യന്തിക ലക്ഷ്യം. കുടുംബത്തിലെ ആത്മബന്ധമില്ലായിമ നോവൽ വായിച്ചുതുടങ്ങുബോൾ തന്നെ നമുക്ക് മനസിലാകുന്ന ഒന്നാണ്. ശങ്കർ മാഷെന്ന ഒരാളുമായി വെങ്കിടേഷിനുള്ള രൂപസാദൃശ്യമാണ് കഥാ തന്തുവായി പരിണമിക്കുന്നത്.കഥപറച്ചിലിൻ്റെ ഒഴുക്ക് അത് വായനയിലുടനീളം ഇടമുറിയാതെ നമുക്ക് ലഭിക്കുന്നു. നോവലിലെ ഓരോ കഥാപാത്രത്തെയും വ്യത്യസ്തമായ തലത്തിൽ നിന്ന് നോക്കി കാണാൻ പാകത്തിലാണ് നോവലിൽ സുധാമൂർത്തി ഇഴചേർത്തിരിക്കുന്നത്.
         രണ്ടാമത്തെ നോവൽ " മുകേഷ് ". വിസ്മയകരമായ പെരുമാറ്റവും ഏറ്റവും നന്നായി മറ്റുള്ളവരെ മനസിലാക്കാനുള്ള ശേഷിയുമാണ് ഈ നോവലിലെ സ്ത്രീ കഥാപാത്രങ്ങളെ വ്യത്യസ്തമാക്കുന്നത്. ആദ്യത്തേതിലെന്നപോലെ ഇതിലും അമ്മയെ അന്വേഷിച്ചു കണ്ടുപിടിക്കുന്നതാണ് നോവൽ പശ്ചാത്തലം. മുകേഷ് മറ്റൊരാളുടെ മകനാണെന്നും മറ്റൊരു സമുദായമായിരുന്നിരിക്കാം എന്നതും അയാളുടെ ഭാര്യയായ സുമതിയിൽ അലോസരമൊന്നും ഉണ്ടാക്കുന്നില്ല. " നിങ്ങൾ ആരുടെയെങ്കിലും മകനായിരിക്കാം പക്ഷേ, നിങ്ങളെപ്പോഴും എൻ്റെ ഭർത്താവായിരിക്കും" എന്ന മറുപടി ഒരു നദിപോലെ ഒഴുകി ആരിലൂടൊക്കെയോ നമ്മേയും വഹിച്ചുകൊണ്ട് കടന്നുപോകുന്നതായി മനസ്സിലാക്കാൻ സാധിക്കും. ഒരമ്മയുടെ വാത്സല്യം അനുഭവിച്ചറിയാൻ കഴിഞ്ഞതിൻ്റെ പാരമ്യത നിങ്ങളിലും ഉണ്ടായേക്കാം.....