സുൽത്താൻ വാരിയംകുന്നൻ - റമീസ് മുഹമ്മദ്

 

 വാരിയം കുന്നത്ത് കുഞ്ഞുമുഹമ്മദ് ഹാജിയുടെ ചരിത്ര ജീവിതത്തെ ഇത്രയധികം സൂക്ഷ്‌മമായും ആഴത്തിലും വിശകലനം ചെയ്ത സമകാലികമായ ഒരു ചരിത്ര വിവരണവും അടുത്തെങ്ങും കണ്ടിട്ടില്ല. ഈ പോരാട്ടത്തിന് സംഘടിത സ്വഭാവവും  നേതൃത്വവും ഇല്ലായിരുന്നെന്ന വാദമുഖത്തെ അപ്പാടെ പൊളിച്ചെഴുതിയിരിക്കുകയാണ് റമീസ് മുഹമ്മദ് ഈ ഗ്രന്ഥത്തിൽ. നൂറ് വർഷങ്ങൾക്കിപ്പുറം നിന്നുകൊണ്ട് വികലമാക്കപ്പെട്ടുകൊണ്ടിരുന്ന ഒരു ചരിത്രത്തെ ഇത്രയും സൂഷ്മമായി കണ്ടെടുക്കയും ആ ചരിത്രത്തെ വികലമാക്കാതെ തന്നെ വായനക്കാരിലേക്ക് എത്തിക്കുകയും ചെയ്യുക അത്ര നിസാരമായ കാര്യമല്ല. ഒന്നാം ലോകമഹായുദ്ധത്തിനുശേഷം ബ്രിട്ടീഷ് ഭരണകൂടം നേരിട്ട ഏറ്റവും ശ്കതനായ സൈന്യത്തിൻ്റെ സൈന്യാധിപൻ്റെ ഒരു ചിത്രം പോലും ചരിത്രത്തിന് നഷ്ട്ടമായെന്ന് പറയുമ്പോൾ ഗുഹാചിത്രങ്ങളിൽ നിന്ന് മായ്ച്ചുകളയപെട്ട അഖിനാറ്റൻ്റെ വിധിയാണ് വാരിയം കുന്നനും സംഭവിച്ചത്.

      വാരിയം കുന്നത്ത് കുഞ്ഞുമുഹമ്മദ് ഹാജി എന്ന വ്യക്തിത്വത്തെ വിശകലനം ചെയ്യുമ്പോൾ അദ്ദേഹം നയിച്ച പ്രസ്ഥാനത്തെയും നടത്തിയ സമരങ്ങളേയും വിശകലനം ചെയ്യാതെ കടന്നുപോകാനാവില്ല. ഒൻപത് വർഷത്തെ ഗവേഷങ്ങൾക്കൊടുവിൽ ഇത് പുസ്തകമാക്കപ്പെടുകയും വാരിയം കുന്നനെക്കുറിച്ച് അപ്രകാശിതമായതും വിപണിയിൽ ലഭ്യമായതുമായ മുഴുവൻ ഗ്രന്ഥങ്ങളും  ഉൾച്ചേർത്ത് ഇത്രയും അധ്യായങ്ങളിലൂടെ വാരിയം കുന്നൻ്റെ ജീവചരിത്രം,രാഷ്ട്രീയം,വിമോചനം,പദ്ധതികൾ എല്ലാം ആവിഷ്‌ക്കരിച്ചിരിക്കുന്നതിന് റമീസ് മുഹമ്മദ് പ്രത്യേക അഭിനന്ദനങ്ങൾ അർഹിക്കുന്നു. അദ്ദേഹത്തെപ്പോലെ ഒരാളുടെ ജീവിതത്തെ തെളിവുകൾക്കും രേഖകൾക്കും ഇടയിൽ നിന്നുകൊണ്ട് വിവരിക്കുക അത്ര എളുപ്പമുള്ള കാര്യമല്ല, അതും നൂറുകൊല്ലം ആയിരത്തോളം ചരിത്രകാരന്മാർ പതിനായിരത്തോളം രേഖകൾ തപ്പിയിട്ടും കിട്ടാത്ത ഒന്നാണ് അതെന്നും ഓർക്കണം.നീണ്ട അന്വേക്ഷണങ്ങൾക്കൊടുവിൽ 1919 മുതൽ 1973 വരെ പ്രസിദ്ധീകരിച്ചിരുന്ന ഫ്രഞ്ച് മാഗ്സസീനിൽ നിന്നും ചരിത്രത്തിന് നഷ്ട്ടപെട്ട ആ ചരിത്ര പുരുഷൻ്റെ ചിത്രവും കിട്ടുന്നു. വാരിയംകുന്നൻ്റെ ജീവിതം മനസ്സിലാക്കുന്നതിനൊപ്പം നാം കണ്ടതും മനസ്സിലാക്കിയതും മലബാറിൻ്റെ ചരിത്രം കൂടിയായിരുന്നു.

     മനോഹരമായ ഒരു വായനയാണ്.തീർച്ചയായും എല്ലാവരും വായിക്കണം...