മൃദ്ധഗ നിർമ്മാണത്തിനുപയോഗിക്കുന്ന മൃഗത്തിൻ്റെ തുകൽ സവർണ്ണ വർഗത്തിൻ്റെ അശുദ്ധിയുടെ കെട്ടുപാടുകൾ ഉണ്ടാക്കും എന്നത് തന്നെയാണ് പ്രധാന കാരണം.അതിനാൽ ഇതിലെ ചർമ്മ സാനിധ്യവും അതുണ്ടാക്കുന്ന ദളിതരുടെ സാന്നിധ്യവും ഈ സവർണ്ണ വർഗത്തെ അലോസരപ്പെടുത്തുന്നുണ്ടാകാം.പശുവിൻ്റെ തുകൽ അവരിൽ തീണ്ടൽ ഉണ്ടാക്കുമെന്ന ഒരു വലിയ സത്യം ഇതുവരേക്കും മറച്ചുവെക്കപ്പെട്ടിരിക്കുകയായിരുന്നു. ഈ പുസ്തകം ഇറങ്ങുന്നതിനു മുൻപ് വരേയും.
അതുകൊണ്ടുതന്നെയാകും മൃദ്ധഗ നിർമാതാക്കളുടെ അറിയാ ജീവിതത്തിലൂടെ കടന്നുപോയ ഈ പുസ്തകത്തിൻ്റെ പ്രകാശനച്ചടങ്ങിന് വേദി നിഷേധിച്ചതും,ആ നിഷേധനം ഒരു ഉദാഹരണമാണ് മൃദ്ധഗ നിർമാതാക്കൾ എത്രത്തോളം അരികുവൽക്കരിക്കപ്പെട്ടിരുന്നു എന്ന് മനസിലാകാൻ...ചരിത്രം ഇന്നും അവരെ ഉൾകൊള്ളാൻ ഒരുങ്ങിയിട്ടില്ല!ഒരുപക്ഷേ ചരിത്രം അവർക്ക് മുഖം തിരിഞ്ഞുനിൽക്കുകയായിരുന്നിരിക്കാം ഇതുവരെ. ജാതീയമായ എല്ലാത്തിലും ഇത്തരത്തിലുള്ള അശുദ്ധി വൽക്കരണം ഉണ്ടായിരുന്നതായി നമുക്ക് കാണാൻ സാധിക്കും.ആ അശുദ്ധി ഇല്ലാതെ ( തുകൽ ) അതെങ്ങനെ ഒരു വാദ്യ ഉപകരണം ആകും?...അത് ദഹിക്കാൻ അൽപ്പം പ്രയാസമുള്ള ചോദ്യമാണ് അല്ലെങ്കിൽ കേൾക്കാൻ ( ചോദിക്കാൻ ) ആളില്ലാത്ത ചോദ്യവും.
ഈ പുസ്തകം പലരേയും അസ്വസ്ഥരാക്കും. തെയ്യം നിങ്ങൾ കാണാറില്ലേ? വേഷം അഴിച്ച് തെയ്യം അല്ലാതാകുന്ന നിമിഷം വേഷം കെട്ടുന്നയാൾ വിവേചനം നേരിടും വേഷം കെട്ടിയാൽ എല്ലാരും ആരാധിക്കും അപ്പോൾ അവിടെ യാതൊന്നിൻ്റെയും വേർതിരിവുകൾ ഉണ്ടാകുന്നില്ല എന്നത് അതിരുകളില്ലാത്ത സത്യമാണ്..വേഷം അഴിച്ചുവെച്ചാൽ ഉണ്ടാകുന്ന ജാതിയപരമായ വിവേചനം അതുപോലെ തന്നെ പ്രകടവുമാണ്.ഇതുവരേയും ആരും ചോദിക്കാത്ത വലിയ ചോദ്യങ്ങളും ബോധപൂർവം നാം മറന്ന ചരിത്രവുമാണ് മാതുഭൂമി ആഴ്ചപ്പതിപ്പ് വായനക്കാർക്കായി ഈ വാരം പങ്കുവെച്ചത്
